Eph 3 | KYG | STEP | Goti'a ani kava'mo nehiya'mofe'mo nagaemo Polo'namo Kalaisi Yesutefe'mo Yu nofi vaya'mo o'mai'nage'nae'mo lapa mae'na kalavusifi'mo mai'ne'nae'mo nunumu'mo hu'na nelapatove.

Ephesians 3

Polo'a alu nofi vaya'aitegamo uno ali'ya'mo ne'aliya kavafe'mo ava gemo hu'niya gemae

1 Goti'a ani kava'mo nehiya'mofe'mo nagaemo Polo'namo Kalaisi Yesutefe'mo Yu nofi vaya'mo o'mai'nage'nae'mo lapa mae'na kalavusifi'mo mai'ne'nae'mo nunumu'mo hu'na nelapatove. 2 Goti'a lapa maesuvafe'mo fiku naha maeno nami'niya kavafe'mo ava gemo lapakaemo ago afi'negae. 3 Goti'a hogoteno alino fala ki male'niya gemo ago alino nave li'niye. Ani kavafe'mo aise gemo ago avo'mo kae'na lapa pai'nove. 4 Lapakaemo lekana paitapa afitetapae'mo, Polo'a Kalaisife'mo ava gemo alino fala ki male'niya gemo ago afi'niye, hutapa afa'a afigae. 5 Goti'a hogoteno akeya'vilagamo muki ma mopafi vaya'aina alino apave oli'niya'monanafa hemenimo Auneme'aleti'mo laote apa vaya'amogita Gotitegati gemo alinita eta aeta hakalo huta hapa nepauna vaya'mo ago alino lave li'niye. 6 Alu nofi vaya'mogi Kalaisife'mo alagepa faigoko ge'amo afite'a apakae'e'mo magoke vaya'mo hamalete'a Goti'a Yu vaya'aina alino apamisige'a alisaya kava hu'a Kalaisiteti'mo aligae. Mafa'ne'apimogimo muki afo'apimogi ya'mo ne'aliya kava hu'a aligae, huno alino lave li'niye. 7 Inagi Polo'namo mani alagepa gelefe'mo ali'ya'amo alisuvafe'mo Goti'a fiku naha maeno namiteno himamu'aleti'mo naipafi'mo ali'ya ali'nige'na ali'ya'amo ne'aluve.

8 Muki apaote vaya'amogimo ae'a naga se'nage'na henaga vekamo mai'nova'monanafa kanale ya'mo ageta lekana opaisuna agufa ya'mo Kalaisi'a alino ne'apamiya kagemi ya'alefe'mo ava gemo alu nofi vaya'aife'mo ae'na hakalo hu'na hapa paisuvafe'mo fiku naha maeno nami'niye. 9 Goti'a Yesu Kalaisiteti'mo muki ya'mo afa yateti'mo alo hu'niya vekamo'a agesamo afiteno'ae'mo, ani kava'mo huguve, huno hisiya kava'mo akeya'vilagamo alino fala ki male'nige'a muki kafuga'ae kafuga'ae'mo o'age'nae. O'age'naya'monanafa hemenimo Goti'a haiya kava huno agesamo afi'niya kava'mo hisifi hu'a muki vaya'mogimo alagepa hu'a agesayafe'mo ali'ya'ale'mo alino nate'niye. 10 Goti'a, alagepa hu'na nagesamo afi'ne'na siosi vaya'alegamo alu kava alu kava'mo hu'na alagepa hu'na hapa maesuge'a enisole vaya'mo koku'napi mai'ne'a yagai'a ne'apataya vaya'mogi agete'apae'mo, Goti'a muki ya'amo alagepa huno age'niya vekae, hu'a hugae, huno hu male'niye. 11 Mani kavafe'mo akeya'vilaga ma mopamo alo osu'niya afina'mo huno'ae'mo, ani kava'mo huguve, huno hu male'niya kava'mo hemenimo Ala kava netimo Kalaisi Yesuteti'mo ago alino afole aino ate'niye. 12 Agaepi'mo mai'neta agaefe'mo lagesa afita fatago nehuna kavateti'mo koli osuge lole lagesamo o'afige hu'neta Gotitegamo ne'une. 13 Inagi nagaemo lapa maesuvafe'mo kanamo ali'nova'mofe'mo lapaipamo'mo kana nehutapae'mo, atalegaune, hutapa osiyo. Mani kavateti'mo ala lapakitapimo aligae.

Polo'a nunumu'mo hu'niya gemae

14 Goti'a fiku lapa maeno lapami'niya'mofe'mo Ala kava netimo Afo'amo aulagale'mo nale'ya fai'ne'na nunumu'mo nehuve. 15 Goti afamo anaga vaya'amo muki koku'napi ne'maiya vaya'e ma mopafi ne'maiya vaya'mogi'e'mo Goti'a afo'apimotegati'mo ala apaki'apimo ne'aliye. 16 Nunumu'mo nehu'nae'mo, lusi kava huka ha le konali vekamo mai'nana'mofe'mo ha le konali kagemi yakalefe'mo Kaunekameteti'mo apakupi mafa'nemo lokiya vaika apato. Kalaisi'a agaefe'mo apakesa afi'a fatago nehaya kavateti'mo apaipafi'mo alagi maino. Kalaisi'a apaipafi'mo mai'nisige'apae'mo hapau apayamopafi'mo hapau'nisige'a hapafu'yamo aegekana hu'a mai'ne'a no'mo fai'a ne'ataya yate'mo alagi atafau'a alagi hu'a maiyo. 18 Ani kava'mo hu'a mai'ne'apae'mo muki apaote vaya'a'e'mo Kalaisi'a hau ayamopafi'mo hau'niya kava'amo age'a alagepa hu'a afa'a ageyo. Haiya agufa afafale haifi haiya agufa afafale lamifi haiya agufa afafale vifi haiya agufa afafale efi hu'a ageyo. 19 Muki alagepa ya'ageke'mo kaipafi'mo havai te'niya agufa kava hu'a kagaekana hu'a maisayafe'mo alagi o'agesaya agufa kava'mo Kalaisi'a hau ayamopafi'mo hau'niya kava'mo ageyo, hu'na nunumu'mo hu'na nelapatove. 20 Lagaemo agaefe'mo ge nehutae'mo, ma kava'mo huvo, huta afi nekona kava'mo agaemo afa'a hugiye, huta lagesamo ne'afuna kava'e'mo afa'a hugiye. Afa'a huno mago'e huno afi nokona kava'e lagesamo no'afuna kava'e'mo laipafi'mo ali'ya'mo ne'aliya himamu'aleti'mo mago'e huno afa'a hugiye. 21 Siosi vaya'amogitamo muki kafuga'ae kafuga'ae'mo agi'ale'mo alita asaga huge huge huta maigetao. He, lama ge.